काँग्रेस कार्यकर्ताद्वारा एक विद्यार्थीको हत्या :

दोलखा, ७  चैत्र । दोलखाको मीर्गे गाविसमा गएराती काँग्रेस कार्यकर्ताद्वारा एक विद्यार्थीर्को हत्या भएको छ । मृत्यु हुनेमा दोलखा जिल्ला मिर्गे गाविस वडा नम्बर ८ निवासी दिपक दाहाल रहेका छन् । अखिल क्रान्तिकारीका जिल्ला सदस्य रहेका दाहालको हत्यामा स्थानीय कांगे्रस कार्यकर्ताहरुको समुहको संलग्नता रहेको स्थानीय बासिन्दाले आशंका गरेका छन् । माओवादी दोलखाले हत्या गर्ने व्यक्तीको खोजबिन भैरहेको जनाएको छ ।

गएराती माओवादी गाविस ईन्चार्ज सहितको टोलीमाथि सो समुहले आक्रमण गरेपछि उहाँहरुसंगै रहनु भएका दाहाल बेपत्ता हुनु भएको थियो । दाहाललाई आज बिहान स्थानिय भित्तेरि खोलामा मृत अबस्थामा फेला पारिएको हो । आक्रमणमा परि माओवादी गाविस ईन्चार्ज हरिबहादुर दाहाल सहित चार जना घाईते भएका छन् ।

क्रान्ती साँच्चैको उत्सव

माओवादी उर्लेर आयो

आउने थिएन, माकुने बौलायो

यो गीत हो । दोहोरी गीतको भाका । यो भाका तपाईंको गाउँघरमा गुञ्जिदैन होला । अनि शहरका गल्ली र महलमा पनि गुञ्जिदैन । 

यो भाका सुन्न मन लाग्यो ? सम्भव भए, तपाईं सिधै देशको प्रमुख प्रशासनीक केन्द्र सिंहदरबार वरिपरि पुग्नुहोस् । बुधबार दिनभर यहीं भाका गुञ्जियो, सिंहदबार वरिपरी । 

त्यो बाटो हिंड्ने बटुवालाई सुनाइएको थिएन । यो त एउटा उत्सवमा गुञ्जिरहेको भाका हो । त्यो उत्सव नागरिक सर्वोच्चतको लागि माओवादीले चालेको दोस्रो चरणको आन्दोलनको उत्सव हो । 

नाम जिल्ला प्रशासन कार्यालय घेराउ कार्यक्रम । छन त ठूल्ठूला स्वरमा नाराबाजी पनि भइरहेको छ । नारा घन्काउँदै नागरिक सर्वोच्चताको माग गरिदैछ, कठपुतली सरकारको राजिनामाको माग भइरहेको छ । 

तर यो कुनै ठूलै महोत्सव जस्तो छ । त्यत्तिमात्र फरक हो, यहाा स्टलहरू खडा गरिएका छैनन् । 

तपाईं जता हेर्नुहोस् र सुन्नुहोस्, उही साँस्कृतिक महोत्सवकोजस्तो दृष्य र गीत सङ्गीतका धुनहरू । युवाहरू मच्चीमच्चि नाचिरहेका र उमेर धल्किएकाहरू पनि कम्मर मर्काइरहेका । 

बुधबार सिंहदबार छेउमै रहेको काठमाडौं जिल्ला प्रशासन कार्यालय घेर्न गएका माओवादी कार्यकर्ता र शुभचिन्तकहरूले देखाएका हुन् यी दृष्य । 

प्रचण्डले केही दिन अगाडि भनेका थिए, \'हाम्रो आन्दोलन उत्सव जस्तै हुनेछ ।\' बुधबार दिउँसोको जिल्ला प्रशासन कार्यालय वरिपरि देखिने दृष्य उत्सव जस्तै थिए । बसिरहेकालाई पनि उठौं उठौं लाग्ने, उठीरहेकालाई नाचौं नाचौं लाग्ने । जम्मैका गीतका भाका, गीतका टुक्का कठपुतली सरकारको गतिविधिलाई आधार बनाएर उनिएका थिए । यही एमालेले महाकाली बेचेको, यिनै माधवले राजाको पाउमा दाम चढाएको, दुई ठाउँबाट हारेर पनि प्रधानमन्त्री भएको, यस्तै यस्तै .........।

त्यो जिल्ला प्रशासन घेराउ, कुनै धर्ना बस्न गएको जस्तो छैन । \'मलाई त उत्सवमा आएको जस्तै भइरहेको छ\', बबरमहलमा नाचिरहेका एकजना मजदुरले भने । \'हामी यसै गरी नागरिक सर्वोच्चताको स्थापना गर्छौं र कठपुतली सरकारलाई ढालेर छाड्छौं,\' उनीसँगैकाले थपे । 

यो उत्सवजस्तो काठमाडौं जिल्ला प्रशासन कार्यालय घेराउ प्रतिनिधिमात्रै हो । भक्तपुर ललितपुरमात्रै होईन देशका सबै जिल्ला प्रशासनमा यस्तै भएका छन्, जिल्ला प्रशासन कार्यालय घेराउ, तर उत्सव जस्तो लाग्ने । कार्यालयलाई घेराबन्दीमा राखेर प्रशासनको दैनिक कामकार्यलाई पनि ठप्प पारेको छ अनि भव्यताकासाथ नाचगान गरेको छ मनोरञ्जन पनि चेतना फैलायो पनि । 

यो विजय भइसकेको अवस्था होईन । तर पनि विजयउत्सव जस्तै लाग्छ, आजकल प्रशासन घेराउ, स्थानीय निकाय घेराउको दृष्य देख्दा । आ-आफ्ना साँस्कृतिक झाँकी, बाजागाजा लिएर सबै सडकमा । 

बिहीबार पनि यस्तै गर्दैछन यी मान्छे । उत्सवलाई मनाईरहेजस्तै गर्ने गरी । सबैभन्दा ठूलो उत्सव त २६ र २७ कात्तिकमा गर्ने तयारी छ माओवादीको । त्यसदिन, कम्तिमा ३ लाख जनालाई सिंहदरबार घेराउ गर्न ल्याउँदैछ माओवादी ।  त्यो पनि प्रशासन घेराउ जस्तै उत्सव रे । प्रशासन घेराउमा सानो सङ्ख्यामा सानै उत्सव भयो, सिंहदबार घेरामा ठूलै सङ्ख्या, ठूलै उत्सव हुने होला ।

नेपालको नवराजन

रामवरण
नेपालको नव-राजन
भारतीय विस्तारबादको शरण
ओली-कोइरालाको चरण

संबिधानको अपहरण
नेपाली जनताको मरण
आन्दोलन र अस्थिरताको कारण
बुद्धि विवेक चौरमा चरन
मान मर्यादा सबै झरन
अबको योजना संबिधानसभाको हरण
जनताले खन्दैछ्न उनको चिहान /

प्रधानमन्त्रीको ठाडो आदेशमा सशस्त्रका डिआइजिको सरुवा

सेतो चश्मा लगाएर हेर्न प्रधानमन्त्रीलाई डिआईजीको सल्लाह

बारा, ५चैत । अन्य डिआईजी आएपछि करिब दुई वर्ष सम्म बस्दै आएको भएपनि मध्य क्षेत्रीय सशस्त्र प्रहरी कार्यालय रुद्र वाहिनी पथलैयाका डिआईजी कृष्ण कुमार तामाङ्गलाइ प्रधानमन्त्री नेपालले एक महिना पनि राम्ररी बस्न नपाउँदै सरुवा गरेकाछन् । प्रधानमन्त्री कार्यालयमा आयोजित सुरक्षा प्रमुखहरुको बैठकमा सशस्त्रका प्रमुख सनत बस्नेतलाई दोस्रो पटक नेपालले तामाङ्गलाई सरुवा गर्न आक्रोशपूर्ण आदेश दिएपछि फिर्ता बोलाएको स्रोतले बतायो ।

पहिलो पटक प्रधानमन्त्री नेपालले डिआईजी तामाङ्गको कार्यशैली व्यवसायिक नभएको र सीमामा हुने अवैध गतिविधिमा उनको संलग्नता रहको जनाउादै सरुवा गर्न कडा निर्देशन दिएकाथिए । आधा महिना बित्दापनि आफ्नो कुरा अटेर गरेपछि आईजिपी बस्नेतमाथि प्रधानमन्त्री नेपाल आक्रोशित भएका थिए । 

डिआईजी तामाङ्गले आफूमाथि प्रधानमन्त्रीले लगाएको आरोपको खण्डन गर्दै आफूलाई कालो चश्मा लगाएर हेरे कालै देख्ने र सेतो चश्मा लागाएर हेरे सेतै देख्ने बताएकाछन् ।

आफूलाई हेर्दा सबैलाई सेतै चश्मा लगाउन अनुरोध समेत गरेकाछन् ।  दोस्रो आदेशपछि बस्नेतले तामाङलाई एक महिनापनि बस्न नदिई उनको स्थानमा मानव स्रोत विभागमा कार्यरत डिआईजी रिसव देव भट्टराईलाई मध्य क्षेत्रीय सशस्त्र प्रहरी मुख्यालय पथलैयाका प्रमुख बनाएर पठाएकाछन् ।

एसएसपीको घर लुटपाट/लुटेराले करिव एक घण्टा बिताए

काठमाडौ, चैत्र ६ - एक बहालवाला एसएसपीको घरमा गएराती लुटपाट भएको छ । एसएसपी जयबहादुर चन्दको महाराजगन्ज, हातिगौडास्थित घर बिहीबार राती लुटिएको हो ।

मुखमा माक्स लगाएर सात जना भन्दाबढिको समुहमा आएका लुटेराको समुहले परिवारका सदस्यलाई नियन्त्रणमा लिइ लुटपाट गरेको चन्दकी श्रीमती मीराले ईकान्तिपुुरलाई बताईन् ।

नगद र सुन सहित १२ लाख भन्दा बढि रुपैंया बरबरको सम्पति लुटिएको उनले जानकारी दिइन् ।

केही समय अघिसम्म महानगरीय प्रहरी अपराध महाशाखामा रहेका एसएसपी चन्द अञ्चल प्रहरी कार्यालय नेपालगन्जमा सरुवा भएका थिए । घरमा लुटपाटको खबर पाएपछि चन्द नेपालगन्जबाट शुक्रबार दिउँसो राजधानी आएका छन् ।

प्रहरी अधिकृतको घरमा लुटपाट भएको यो घटना पहिलो भने हैन । एक बर्ष अघि हेपाली हाइटमा बहालवाल डिएसपी हिमाल श्रेष्ठको घरमा पनि लुटपाट भएको थियो ।

गत बर्ष फागुन २६ गते राती १ बजे पछाडी पटट्ीको ढोकाबाट भित्र पसेका उनीहरुले पालिएको कुकुरलाई बेहोस हुने औषधी ख्वाएर लुटेका थिए ।

घरमा आएका लुटेराहरुले डिएसपी घरमै रहेका बेला परिवारका सदस्यलाई नियन्त्रणमा लिएर झण्डै ९ लाख लुटपाट गरेको श्रेष्ठकी श्रीमतीले बताईन् ।

यस्तै डेढबर्ष अघि बत्तिसपुलीमा एसएसपी सुदिपराज आचार्यको घर पनि दिउँसै लुटिएको थियो । दिउँसो १२ बजे तिर घरको पछाडीको ढोकाबाट किचेनमा पसेर माथी उक्लँदैै परिवारका सबै सदस्यलाई नियन्त्रणमा लिएर सुन सहित ९ लाख जति लुटेका थिए ।

प्रहरीले घटनाको लामो समयपछि त्यो घटनामा संलग्न लुटेरालाई पक्राउ गरेको थियो । तर, लुटिएको सामान फेला नपरेको एसएसपी आचार्यले बताए ।

गर्भनरमा खतिवडा/विवादास्पद एमआरपी पासपोर्ट छपाइ भारतमै

काठमाडौं, चैत्र ६ - नेपाल राष्ट्र बैंकको गर्भनरमा युवराज खतिवडा नियुक्त भएका छन् । लामो समयको विवादपछि शुक्रबार साँझ बसेको मन्त्रिपरिषद् बैठकले खतिवडालाई गर्भनरमा नियुक्त गरेको हो । झापा घर भएका खतिवडा अहिले राष्ट्रिय योजना आयोगका उपाध्यक्ष छन् ।

मन्त्रिपरिषद् बैठकले गरिवी निवरण कोषको उपाध्यक्षमा विद्याधर मल्लिकलाई नियुक्त गरेको छ । उनी राष्ट्रपति कार्यालयका आर्थिक सल्लाहकार हुन् । तथा राष्ट्रिय योजना आयोगको उपाध्यक्षमा जगदीश चन्द्र पोखरेललाई नियुक्त गर्ने कांग्रेस-एमालेबीच सहमति भएपनि सत्ता साझेदार मधेसी जनअधिकार फोरम लोकतान्त्रिक नमानेका कारण निर्णय हुन सकेन ।

मन्त्रिपरिषद् बैठकले मेसिन रिडेबल पासपोर्ट (एमआरपी) छपाइ भारतमै मिलाउन परराष्ट्र मन्त्रालयलाई पत्राचार गर्ने निर्णय गरेको छ । सार्वजनिक लेखा समितिले भने एमआरपी छपाइ प्रतिष्पर्धाबाट गर्न आग्रह गरेको थियो ।

सात महिनादेखि नुनसमेत पाएका छैनन्

बाजुरा, ५ चैत

सुदूरपश्चिमको विकट पहाडी जिल्ला बाजुरामा चैतको सुरुवातमै भोकमरीले सताएको छ । खाद्यान्न लिन सदरमुकामस्थित खाद्यसंस्थानको डिपोमा आउने भोकमरीपीडित सधैँ रित्तो हात र्फकन बाध्य छन् । खाद्यसंस्थानले 'गोदाम खाली छ' भन्दै फर्काउने गरेको उनीहरूले बताएका छन् । बाजुरामा नुनसमेत अभाव भएको छ ।

सरकारले अनुदानमा दिने नुन सात महिनाअघि नै र यस वर्षको खाद्यान्न कोटा पनि फागुनको दोस्रो सातामै सकिएपछि बाजुरामा भोकमरी चलेको हो । 'आफूले उब्जाएको अन्नले तीन महिना पनि खान पुग्दैन, सरकारले दिएको अनुदान पनि सकियो भनेर फर्काउँछन्, अब कसरी बाँच्ने ?' सदरमुकाममा नुन र खाद्यान्न लिन आएका स्थानीयवासीले गुनासो गरे ।

उत्तरी भेगका ११ र सदरमुकामनजिकका ६ गाविसमा भोकमरी लागेको स्थानीय एक गैरसरकारी संस्थाका अध्यक्ष गगन रावलले बताए । यी गाविसमा लामो समयसम्म खडेरी पर्नाले खेतबारीमा लगाएको खाद्यान्न बाली नष्ट भएको उनले बताए । 'अन्न त छैन-छैन, कन्दमुलसमेत छैन,' रावलले भने, 'खाद्यसंस्थानको गोदाम रित्तिएको छ, अब बाजुरामा चरम भोकमरी चल्ने देखिन्छ ।'

खाद्यसंस्थानको मार्तडी शाखा र कोल्टी डिपोका लागि यस वर्ष सात हजार पाँच सय क्विन्टल चामल स्वीकृत भएको थियो । साताको दुईपटक मात्र वितरण गर्दा पनि एक हजारदेखि १२ सय क्विन्टलसम्म चामल खपत हुने भएकाले समस्या भएको संस्थानले जनाएको छ । थप चामल नआउन्जेल कोल्टीमा खाद्यान्न वितरण गर्न नसकिने संस्थानको भनाइ छ । कोल्टी खाद्यडिपोबाट चामल माग गरिए पनि कहिले आउने हो, अत्तोपत्तो नभएको डिपोस्रोतले बताएको छ ।

जिल्ला खाद्यसुरक्षा समितिका संयोजक तथा प्रमुख जिल्ला अधिकारी योगेन्द्रप्रसाद पाण्डेले जिल्लाका पूर्वी भागमा खाद्यसंकट भएको स्वीकार गरेका छन् । उनले भने, 'सदरमुकाममा खासै समस्या छैन, खाद्यसंस्थानमा चामल सकिएको हुनाले पूर्वी क्षेत्रका केही गाविसमा अभाव देखिएको छ ।'

८ चैतसम्म जसरी पनि सो क्षेत्रमा चामल वितरण गरिने उनले बताए । हाल कोल्टी खाद्यडिपोमा पाँच सय ५० क्विन्टल मात्र चामल स्टक रहेको र त्यति चामल एक दिन वितरण गर्न पनि नपुग्ने भएकाले वितरणमा ढिलाइ भएको उनले प्रजिअ पाण्डेले जानकारी दिए ।

बाजुरामा अहिले नुन प्रतिकिलो ५० देखि ५५ रुपैयाँ पर्छ । 'त्यो पनि भनेको वेलामा पाइँदैन,' साप्पाटाका मनबहादुर रोकायाले भने, 'नुनसमेत खान नपाउने दिन आए, यो समस्या कसले बुझिदेला ।'

जिल्ला कृषि विकास कार्यालयले दिएको जानकारीअनुसार गत वर्षभन्दा यस वर्ष जिल्लामा ७० प्रतिशतले खाद्यान्न उत्पादनमा ह्रास आएको छ । बाजुरामा वाषिर्क ३० हजार मेटि्रकटन खाद्यान्न चाहिने भए पनि १७ हजार मेटि्रकटन मात्र उत्पादन हुने गरेको कार्यालयले जनाएको छ ।