चुलियो राखेप-एनओसी विवाद

काठमाडौं, ५ चैत

नेपालका राष्ट्रिय खेल संघहरूमध्ये सर्वाधिक विवादमा आइरहने कबड्डी संघलाई बुधबार राष्ट्रिय खेलकुद परिषद् (राखेप) ले विघटन गरेपछि नेपाली खेल क्षेत्रमा नयाँ विवादको बीउ रोपिएको छ ।

सुनील राजकणिर्कारको अध्यक्षतामा रहेको कबड्डी संघलाई विघटन गरेर लालकाजी लामाको नेतृत्वमा तदर्थ संघ गठन गर्ने परिषद्को निर्णयलाई नेपाल ओलम्पिक कमिटी (एनओसी) ले ठाडै अस्वीकार गरेको छ । 'परिषद्को निर्णयलाई हामी मान्दैनौँ, परिषद्का सदस्यहरू समावेश गरेर बनाइएको छानबिन समितिले दिएको रायको आधारमा नियतवस सो निर्णय गरिएको छ,' आफ्नो कमिटीका सदस्यसमेत रहेका राजकणिर्कारको बचावमा एनओसीका अध्यक्ष ध्रुवबहादुर प्रधानले नयाँ पत्रिकासँग भने, 'कुनै व्यक्तिले गल्ती गरेको छ भने उसलाई कानुनी आधारमा हटाउनुपर्छ, सम्पूर्ण संघलाई नै विघटन गर्न मिल्दैन ।'

११औँ ढाका दक्षिण एसियाली खेलकुद (साग) को तयारीबाट समेत अलग राखिएका राजकणिर्कारले सो खेलकुद आयोजनाका क्रममा नेपालबाट आधिकारिक रूपमा रेपीका रूपमा सहभागी दिनेश पाललाई अपहेलित गर्नुका साथै अन्य प्रशिक्षकसँग मैदानमा नै झगडा गरेका थिए । साथै त्यही वेला उनले पुरुष कबड्डीका प्रशिक्षक विमल पोखरेल तथा महिला टोलीका प्रशिक्षक तारासिंह भाटलाई समेत आफ्नो भूमिकाबाट अलग गराउने प्रयास गरेका थिए ।

त्यही कारणले राजकणिर्कार र प्रशिक्षकहरूबीच सुरु भएको मुक्कामुक्की साम्य पार्न आयोजकलाई समेत हम्मेहम्मे परेको थियो । कबड्डीको अन्तर्राष्ट्रिय निकायको सदस्य तथा दक्षिण एसियाली निकायको महासचिवसमेत रहेको घमण्डमा आफ्नै मुलुकका सहभागीलाई अपमान गरेको आरोप नेपाली प्रशिक्षकहरूको थियो, त्यसवेला । साथै ढाका सागको तयारीमा आफूलाई अलग राखिएको रिस फेर्न राजकणिर्कारले आफ्नो 'पावर' प्रयोग गरेको आरोप पनि खेप्नुपरेको थियो ।

राष्ट्रिय खेलकुद परिषद्ले सम्मान साथ रेप|mीको भूमिकामा ढाका पठाएका पालको सर्टिफिकेट नै नक्कली भएको आरोप लगाउनसमेत उनी चुकेका थिएनन् । 'राष्ट्रिय खेलकुद परिषद्ले पालको सर्टिफिकेट सक्कली भएको प्रमाणित गर्न सक्छ भने अहिले नै राजीनामा दिन्छु,' राजकणिर्कारले बिहीबार नयाँ पत्रिकासँग दाबी गरे । साथै उनले मुलुकभित्र र बाहिर आर्जेको पदको आधारमा आफ्नो मान्यतालाई पुनस्र्थापित नगर्ने हो भने नेपालको कबड्डी खेलको विकास हुन नसक्ने दाबी पनि गरे । 'यसले खेलाडीहरूलाई प्रत्यक्ष मारमा पार्छ,' उनको चेतावनी छ ।

झन्डै दुई दशक संघमा बिताएका राजकणिर्कारको पालामा बृहतबाहेक अन्य अवसरमा एउटै पनि राष्ट्रिय प्रतियोगितासमेत हुन सकेको थिएन भने वेलावेलामा उनको र प्रशिक्षकबीचको विवादले महत्त्व पाउने गरेको छ । परिषद्ले राजकणिर्कारले ढाकामा मुलुकको प्रतिष्ठामा आँच पुर्‍याएको दाबीसहित उनको संघलाई बुधबार विघटन गर्ने निर्णय गरेको थियो । परिषद्का सदस्य लालकाजी लामाको संयोजकत्वमा गठित तीन सदस्यीय छानबिन समितिको सिफारिसका आधारमा परिषद्ले सो निर्णय गरेको हो ।

'अन्तर्राष्ट्रिय ओलम्पिक कमिटी र अन्तर्राष्ट्रिय कबड्डी महासंघले मान्यता दिएको संघलाई नियतवस विघटन गर्न मिल्दैन,' प्रधानको दाबी छ, 'अहिले पनि अन्तर्राष्ट्रियस्तरमा राजकणिर्कारको संघले नै मान्यता पाउँछ, यसले खेल तथा खेलाडीलाई नराम्रो असर पुर्‍याउँछ ।' उता एनओसीका महासचिव जीवनराम श्रेष्ठसमेत राजकणिर्कारको संघ नै मान्यताप्राप्त संघ भएको दाबी गर्छन् । 'कुनै व्यक्तिले गल्ती गरेको छ भने उसलाई संघले नै लोकतान्त्रिक ढंगबाट कारबाही गर्नुपथ्र्यो,' श्रेष्ठको दाबी छ, 'एक व्यक्तिको कार्यका लागि सम्पूर्ण संघ कारबाहीको भागीदार बन्न सक्दैन ।'

उता परिषद्का सदस्य-सचिव हरिबाबु चौधरी भने आफूहरूको निर्णय सही रहेको दाबी गर्दै खेलको विकासका लागि नै सो निर्णय गरेको बताउँछन् । साथै उनले एनओसीले जेजस्तो चेतावनी दिए पनि आफ्नो निर्णयमा अडिग रहने बताउँछन् ।

तदर्थ समितिको नेतृत्व पाएका लालकाजी लामा भने एनओसीले विरोध गरेको भरमा केही नहुने दाबी गर्छन् । 'एनओसी भनेको एनजिओ र आइएनजिओजस्तो संस्था हो भने परिषद् मुलुकको अंग हो, मुलुकले गरेको निर्णय मान्दिन भन्नु घमण्ड मात्रै हो,' लामाले भने, 'अब म समयअनुकूल संघको चुनाव गराउँछु तथा सागमा पदक जित्ने टोलीको पनि सम्मान गराउँछु ।'

साथै उनले अन्तर्राष्ट्रिय मान्यता कसैको पेवा नभएको तथा भोलि आफूहरूले सो मान्यता पाउने दाबी पनि गरे । कबड्डीकी मुख्य प्रशिक्षक शान्ति सिंह पनि राजकणिर्कारलाई हटाइएकोप्रति खुसी छिन् । यद्यपि उनी एक व्यक्तिको गल्तीको सजाय सम्पूर्ण संघलाई नदिएको भए पनि हुन्थ्यो भन्ने मत राख्छिन् । 'सुनीलको संघ पनि कुनै निर्वाचित संघ होइन, अहिले निर्वाचित संघलाई विघटन गरिएको पनि होइन तथा ऊ -राजकणिर्कार) सँग आफू अध्यक्ष बनेको कागजपत्रसमेत छैन,' सिंहको दाबी छ, 'अब चुनावबाट जो आउँछ उसलाई सहयोग गर्न हामी तयार छौँ ।'